Nëse mendoni se koronavirusi vetëm sa ka gjunjëzuar njerëzimin, gaboheni! Kjo pasi virusi vdekjeprurës ka arritur deri në majë të botës. Raportohet se Nepali ka vendosur që të ndalojë ekspeditat në malin Everest për këtë sezon ngjitjeje, për shkak të përhapjes me shpejtësi të pandemisë botërore.
“Ekspeditat në malin Everest janë mbyllurm me efekt të menjëhershëm. Lejet e ngjitjes anulohen deri në fund të prillit”, tha Sekretari i Turizmit të Nepalit, Kedar Bahadur Adhikari.
Vendimi vjen në fillimin e sezonit të ngjitjes për këtë vit, i cili tashmë ishte duke u zhvilluar në mes të shqetësimeve rreth mbipopullimit në majën më të lartë të tokës. Lejet për t’u ngjitur në Everest kushtojnë rreth 11.000 dollarë.
Frymëmarrja pengohet nga lartësitë ekstreme në mal, kështu që një shpërthim i koronavirusit, i cili shpesh shkakton probleme të frymëmarrjes, mund të jetë veçanërisht shkatërrues në një kamp bazë në Everest.
Pak çaste më parë, presidenti i SHBA-së, Donald Trump shpalli gjendjen e emergjencës për shkak të koronavirusit. Në një deklaratë nga Shtëpia e Bardhë, presidenti ka kërkuar nga spitalet që të marrin masa në lidhje me këtë pandemi.
“Unë po deklaroj zyrtarisht një emergjencë kombëtare. Dy fjalë shumë të mëdha”, tha ai.
Europa është kthyer në epiqendrën e koronavirusit në botë. “Europa tani është bërë epiqendra e pandemisë”, tha kreu i OBSH-së, por pa dhënë shifra për krahasimin e tij me Kinën.
Sipas tij, kjo lidhet me shfaqjen e më shumë rasteve të reja në kontinent, krahasuar me ato që kishte Kina në kulmin e shpërthimit të saj.
