Ministrja e Shëndetësisë dhe Mbrojtjes Sociale, Ogerta Manastirliu është shprehur se për herë të parë në vend do të përcaktohet në ligj rimbursimi i pajisjeve mjekësore.
Gjatë fjalës së saj në Kuvend, Manastirliu tha se këto ndryshime do të sjellin një përmirësim të procedurave rregullatore të sektorit, për më shumë siguri për pacientët.
“Është një ndryshim i rëndësishëm i cili do të ndodhë për sa i përket regjistrimit, licencimit të pajisjeve mjekësore, afateve të certifikimit të tyre bazuar mbi eksperiencat më të mira ndërkombëtare”, tha ajo.
Më tej ajo deklaroi se projektligji i ri do të garantojë cilësinë dhe ruajtjen e standardeve më të mira mbi pajisjet shëndetësore që prodhohen.
“Për herë të parë përfshijmë në kategoritë e pajisjeve mjekësore dhe elementë të rëndësishëm të atyre pajisjeve të cilat kanë të bëjnë me materialet apo pajisjet estetike, të cilat kanë qenë të parregulluara në treg më parë, për sa i përket të gjithë atyre klinikave estetike apo shërbimeve që ofrohen dhe që nuk kanë qenë të rregulluara, nëpërmjet dispozitave ligjore përkatëse”, shtoi ajo.
Sipas ministres, ky projektligj parashikon edhe rimbursimin e pajisjeve mjekësore nga skema e sigurimeve shëndetësore.
“Kemi pasur praktikë shumë të mirë në rimbursimin e fishave të diabetit tek fëmijët. Por ne duam ta rrisim gamën e rimbursimit të pajisjeve mjekësore, materialeve mjekësore të cilët ndihmojnë grupet të ndryshme të shoqërisë të cilët kanë sëmundje kronike të mbështeten direkt nga shteti nëpërmjet vendosjes të pajisjeve mjekësore të rimbursueshme”, tha ajo.
