Dorëzimi në Kongres i dosjes për shpalljen “non grata”, ka alarmuar Sali Berishën. Ish-kryeministri nisi një lëvizje kundër Bashës në PD, me shpresën se kjo do i rriste reputacionin dhe do të detyronte amerikanët të tërhiqeshin nga masat kundër tij. Por dorëzimi i dosjes në Kongres është një sinjal i qartë se për amerikanët, është kapitull i mbyllur.
Kur dosja për Berishën ka shkuar në Kongres, SHBA kanë nisur lëvizjet për të bllokuar pasuritë e pushtetarëve të korruptuar në Ballkan. Pak muaj më parë, presidenti Joe Biden nxori një dekret që penalizon të gjithë ata të cilët minojnë demokracinë dhe kërcënojnë paqen në rajon.
I ndodhur përballë kësaj situate, dje Berisha ka rritur presionin ndaj Ambasadës Amerikane. Gjatë foltores së mbajtur në Elbasan, ai paralajmëroi protesta. Po kështu tha se mund të tentojë të marrë drejtimin e PD-së.
Dorëzimi i dosjes së Sali Berishës në Kongres, pritet të shtojë telashet për ish-kryeministrin shqiptar. Ambasadorja Kim dha sinjale se nuk ka asnjë tërheqje në këtë aspekt, e siç duket, po shkohet drejt hapjes së “Kutisë së Pandorës”.
