Ministri në detyrë për Evropën dhe Punët e Jashtme, Gent Cakaj, deklaroi se pjesëmarrja e tij në mbledhjen e Komisionit për Integrimin Evropian, kishte në fokus diskutime mbi punën e pakursyer politike, diplomatike e institucionale të Qeverisë, për të avancuar më tej në procesin e integrimit evropian.
Përmes një postimi në Facebook, Cakaj thekson se kjo është një periudhë shumë e rëndësishme politike për Shqipërinë. Pas vendimit për hapjen e negociatave për anëtarësim në BE, Cakaj shprehu se sfida e radhës është plotësimi i kushteve për mbajtjen e Konferencës së Parë Ndër-Qeveritare.
Sipas tij, përderisa qeveria po kryen përgjegjësitë e saj në këtë drejtim, duhet nënvizuar se plotësimi i kushteve për çeljen e negociatave kërkon përkushtim maksimal nga të gjitha institucionet e përfshira në këtë proces.
“Shqipëria nuk ka zgjidhje tjetër veç punës në drejtim të anëtarësimit në Bashkimin Evropian!”, shkruan ai.
