Kreu i KQZ-së, Klement Zguri mund të japë dorëheqjen nga posti i kreut të Komisionit Qendror të Zgjedhjeve. Sipas disa burimeve për Report Tv, kreu i KQZ-së pritet të japë dorëheqjen në ditët në vijim, pasi ka vendosur që të respektojë dekretin e presidentit Meta.
Në mbledhjen e sotme, Zguri nuk ishte në drejtimin e mbledhjes së KQZ-së, e cila u drejtua nga nënkryetari Denar Biba, ku u miratuan disa vendime për përgatitjen e zgjedhjeve lokale në 30 Qershor, pasi shumica është e vendosur për zhvillimin e tyre.
Menjëherë sapo Ilir Meta anuloi zgjedhjet ai u largua nga mbledhja që kërkuan anëtarët e shumicës, duke deklaruar se do të respektojë vendimin e kreut të shtetit dhe se përgatitjet për procesin nuk mund të vijojnë.
Por çfarë ndodh nëse Klement Zguri largohet?
Në qoftë se pjesë e KQZ-së do jenë vetëm katër anëtarë të mazhorancës, atëherë vendimet do të legjitimoheshin nga Kolegji Zgjedhor, pasi disa vendime përfshirë edhe atë për shpalljen e rezultatit duhet të merren me pesë vota pro.
Klement Zguri u emërua kryetar i KQZ-së në vitin 2017 pas marrëveshjes mes kryeministrit Rama dhe kreut të PD-së Lulzim Basha.
Kujtojmë se 5 anëtarëve të mazhorancës në KQZ u janë vendosur truproja për shkak të vendimit të tyre, për të mos miratuar dekretin e presidentit Meta.
Denonco ne TT