Egert Vargu, i arrestuar si agjent doganor i kompanisë “Apetit Group”, në konteinerin e se cilës u gjet 45.5 kg kokainë, është anëtar i Këshillit Bashkiak në Tiranë. Para hetuesve ka deklaruar se është agjent i pavarur doganor dhe se punon bashkë me gruan. Sipas tij, ka bërë veprimet doganore për kompaninë dhe s’ka asnjë njohje dhe as lidhje. Pas arrestimit dhe procedimit penal ndaj tij, i pezullohen funksionet publike.
“S’kam asnjë lidhje me këtë punë. Puna ime është të bej procedura zhdoganimi. Unë nuk kontrolloj konteinerë. Nuk është puna ime. Puna ime është të merem me dokumentacionin”, ka thënë ai në dëshminë e tij, duke hequr nga vetja çdo përgjegjësi në lidhje me sasinë e drogës të kapur në Durrës.
Vargu është në prangat e policisë së Durrësit, nën dyshimet se është i përfshirë në trafikun e 45.5 kilogramë kokainë nga Brazili drejt Shqipërisë.
Kamioni pasi u ndalua e pas kontrollit është zbuluar se brenda kishte drogë që për destinacion kishte Maqedoninë e Veriut. Ngarkesa me mish po kalonte tranzit në Shqipëri, dhe do të zbrazej në magazinën e një firme private në vendin fqinj. Egert Vargu është anëtar i Këshillit Bashkiak të Tiranës, dhe zyrtari i radhës i Partisë Socialiste i arrestuar për çështje kokaine.
39-vjeçari, banues në Tiranë, me detyrë agjent doganor i kontraktuar nga kompania “Apetit Group”, rezulton edhe anëtar i Komisionit të Financës dhe Buxhetit në Bashkinë e Tiranës.
