Ndërsa opozita do mbajë protestën e gjashtë kombëtare kundër qeverisë më 25 maj, analisti Lorenc Vangjeli ka zbuluar detaje të reja nga përgatitja e forcave të Policisë së Shtetit. Ai tha mbrëmë në “Opinion” se socialistët po diskutojnë që përballë protestuesve të vendosin vetëm 4 apo 5 policë.
Po sipas tij, ende nuk dihet se për çfarë arsye mund të tentohet kjo taktikë. “Ka një informacion, që në datën 25 maj në vend të 1500 policëve do vënë nja 4-5 përballë demonstruesve. Ju i dilni për zot demonstruesve të mos kalojnë gardhin?, i’u drejtua ai ish-kryeministrit Berisha.
Kjo deklaratë i parapriu letrës së tretë publike të kryeministrit Rama drejtuar kryedemokratit Basha, duke apeluar për dialog.
Pak ditë më parë, kryedemokrati Basha i’u përgjigj ftesës së kryeministrit Edi Rama dhe thirrjeve të ndërkombëtarëve, për dialog politik. Nga bashkëbisedimi me gazetarët, Basha u shpreh se çelësi që zgjidh krizën politike është largimi i kryeministrit Edi Rama. Po kështu, ai tha se mirëpret angazhimin e ndërkombëtarëve, për t’i dhënë zgjidhje situatës që po kalon vendi.
Nga ana tjetër, faktori ndërkombëtar është shprehur se protesta është një e drejtë legjitime e qytetarëve, teksa vëren se ka ardhur koha që partitë politike t’i rikthehen dialogut.
