Ambicia e hapur e Kinës për të qenë superfuqia kryesore e botës, po shtrihet edhe në dominimin e hapësirës, ku rivalja kryesore është sërish SHBA-ja. Deri në vitin 2022, Kina do të hedhë në orbitën e Tokës, në lartësinë 500 km, 3 satelitë artificialë të veçantë.
Ato nuk do të bëjnë transmetim sinjalesh, por do të bëjnë punën që bën edhe Hëna e plotë natën. Secila prej tyre, do të jetë e pajisur me pasqyra të mëdha, që do të reflektojnë në Tokë dritën e Diellit. Shkencëtarët kinezë, llogarisin që kjo dritë mund të mbulojë një sipërfaqe prej 3.600- 6.400 km katrorë, dhe intensiteti i ndriçimit pritet të jetë 8 herë më i madh se drita e Hënës, që ndodhet rreth 380.000 km larg Tokës.
Përdorimi i Hënës artificiale, për të ndriçuar një zonë 50 km2, mund të kursejë 170 milionë dollarë energji elektrike. Këto Hëna artificiale, mund të ndriçojë zonat që zhyten në errësirë pas katastrofave natyrore si tërmetet.
Më herët eksperimente të ngjashme kanë bërë SHBA-ja dhe Rusia. Në vitet 1990, Rusia kreu eksperimentin “Banner”, kur një pasqyre reflektonte dritën e diellit në Tokë. Por pasqyra nuk arriti të shpaloset në hapësirë, dhe eksperimenti u braktis.
TIRANA TODAY
