Mjeku Petrit Vargu, i shkarkuar nga detyra disa muaj më parë, do të rikthehet së shpejti në detyrë, pas vendimit të formës së prerë të Gjykatës së Apelit. Ai njofton se drejtoria e QSUT do ta kompensojë financiarisht, e në të njëjtën kohë tregon se sa krenarë ndihet për këtë fitore të drejtësisë.
Mjeku i njohur shprehet me anë të një postimi në rrjetet sociale, se ka fituar betejën ligjore në të gjitha shkallët e gjyqësorit, për atë që e cilëson si një përjashtim të padrejtë nga puna e tij në QSUT. Në të njëjtën kohë, ai kërkon që këto para të mos i merren taksapaguesve, por atyre që morën vendimin për ta shkarkuar nga QSUT-ja.
Postimi i mjekut Petrit Vargu:
Të nderuar miq !
Se shpejti kthehem në punën time, në vendin ku kam studiuar e punuar (QSUT).
Gjykata e Apelit dha vendimin e formës së prerë, të kthimit tim në punë dhe drejtoria e QSUT do të më kompensojë financiarisht.
Është mirë, që menaxherët e rilindjes t’i paguajnë këto lekë nga xhepi i tyre.
Shteti shqiptar nuk duhet të dëmtohet për arsyen e thjeshtë që rilindas të rastësishëm, vendosen në poste drejtuese.
Rasti i përjashtimit tim nga puna, uroj të mos i ndodhë askujt që ka vendosur të jetojë në vendin e tij.
Një gjë është e qartë që këta nuk kanë as turp dhe as kurajo që të korrigjojnë vetë gabimin.
Për këta turp është të kesh turp.
Krenar për fitoren e thellë, përqafoj të gjithë dashamirësit….
