Koordinatori i Bindjes Demokratike, Astrit Patozi, e ka cilësuar si brutal draftin e paraqitur nga mazhoranca në Këshillin Politik.
I ftuar në emisionin “Ditari i Mëngjesit” në A2, Patozi u shpreh i bindur se drafti në fjalë nuk do të marrë votat e duhura në parlament.
Sipas tij, tenton të kërkojë sa më shumë për të bërë lëshime, që më pas të arrijë aty ku ajo dëshiron.
“Drafti i mazhorancës është brutal, i papranueshëm dhe i pamiratueshëm sipas meje. Shqipëria ka nevojë për një hapje të vërtetë të listës. Nuk ka nevojë për akrobaci hileqari. Drafti i Gjiknurit nuk ka asnjë shans të kalojë në Kuvend. Kjo është një taktikë për ta ngritur stekën lart dhe për të shkuar në një variant të pranueshëm nga të gjitha palët.
Në rrafshin konceptual është i papranueshme sepse nuk i hap listat, i le ato në humorin e kryetarit të partisë, heq koalicionit dhe në rastin e prishjes së koalicioneve nuk ka kuptim hapja e listave dhe i shtohet një barrierë tjetër për forcat e reja politike që është pragu 3% që nuk ka asnjë kuptim”, tha ai.
Më tej, Koordinatori i Bindjes Demokratike ka komentuar edhe opinionin që PD kërkon nga OSBE-ODIHR, duke u shprehur se kjo lëvizje bëhet thjesht për të fituar kohë.
Patozi thekson se PD dhe aleatët kanë vetëm një vendimmarrje për të bërë dhe ajo është se çfarë do të bëjnë me listën.
“Këshillimi me OSBE-ODIHR është një instrument për të fituar kohë. Përse i duhet kohë kur zgjedhje po afrojnë? PD duhet të jetë në fushë. Fakti që zvarritet, PD shpreson për një marrëveshje me mazhorancën ose do të shtyjë vendimmarrje me aleatët e saj dhe se çfarë do bëjë me listën. PD ka vetëm një vendim me aleatët do garojnë bashkë apo secili më vete”, tha ai.
