Detaje të reja janë mësuar nga plagosja me armë zjarri që ndodhi mëngjesin e sotëm në rrugën “Ndre Mjeda” në Tiranë. Një sherr mes 2 ortakëve të një pallati në ndërtim, ka përfunduar deri në përdorimin e armëve.
Ngjarja ka ndodhur rreth orës 09:30 të mëngjesit të kësaj të mërkure, në lagjen “Ndre Mjeda”, e njohur si zona e ish-parkut të autobusëve.
I plagosur ka mbetur biznesmeni Sino Llanaj, ndërsa autori Albert Allmuça është shpallur në kërkim. Para rreth 6 muajsh, për shkak të konflikteve që kanë patur me njëri-tjetrin, dy pronarët Albert Allmuça dhe Sino Llanaj, në lidhje me mënyrën se si kanë shitur apartamentet e pallatit në fjalë kanë patur një konflikt i cili ka çuar në bllokimin e rrugës me kamionë, si edhe sherr fizik mes tyre. Rasti më i fundit ishte në zonën e ‘Astirit’, raporton “Shqiptarja”.
Pallati është në ndërtim në rrugën “Ndre Mjeda”, në njërën prej zonave që po merr mjaft zhvillim së fundmi në Tiranë.
