Aktorja e njohur dhe njëkohësisht deputetja e Kuvendit të Kosovës, Adriana Matoshi, është kërcënuar. Kërcënimet që kanë ardhur në adresë të saj, janë pasi ajo është angazhuar në mbrojtjen e të drejtave të grave.
Matoshi ka deklaruar publikisht se ka marrë kërcënime të ndryshme, pasi i është futur kësaj rruge. Ajo ka një mesazh ndaj të gjithë atyre që mendojnë se e kanë frikësuar, ndërsa nënvizon se hyrja e saj në Parlament ka një mision.
Deputetja thotë se nuk do të ndalet për të qënë një krahë i ngrohtë për çdo femër, për të fituar lirinë, e për të jetuar e lirë dhe e pacënuar nga askush.
Statusi
Ditëve të fundit jam bërë cak i kërcënimeve të ndryshme për shkak të angazhimit tim në mbrojtje të drejtave të grave, sidomos ndihmës që po ju jap grave të cilat me vite kanë pësuar dhunë psiqike e fizike nga burrat e tyre.
Gabon rëndë ai që mendon që më frikëson, sepse hyrja ime në politikë dhe parlament ka një mision, i cili nuk do të pushojë para se çdo nënë, motër e grua ta fitojë lirinë dhe të drejtën e vet elementare njerëzore për të jetuar e lirë dhe e pacënuar nga askush.
