Këngëtari i njohur grek, Notis Sfakianakis, i cili u arrestua mbrëmjen e së dielës, është shprehur se armën e mban ngaqë është në rrezik. Këngëtari shkoi pranë gjykatës bashkë me oficerët e policisë. Me maskë, syze dhe kapele, Notis shihet i prangosur teksa shkon për të marrë dënimin e tij.
“Mbaj armë me vete, sepse jam në rrezik. Leja për armën më kishte mbaruar, dhe nuk e kisha rinovuar”, është shprehur ai përpara autoriteteve. Sa i takon sasisë së kokainës që iu gjet në çantë, ai u tha policëve në momentin që ia zbuluan: “Është ashtu siç mendoni. Bëni punën tuaj, sepse e bëni mirë”.
Këngëtari u procedua për ‘posedim droge’ dhe ‘armëmbajtje pa leje’. Sipas informacioneve, Sfakianakis ishte plotësisht bashkëpunues me policinë.
Notis Sfakianakis u arrestua në periferi të Athinës, pasi gjatë kontrollit në makinë iu gjet 2 gr kokainë dhe një pistoletë. Efektivët e ndaluan makinën luksoze të këngëtarit, pa ditur cili ishte brenda, duke nisur vetëm nga kontrollet për masat anti-covid.
Një pikë kontrolli e ngritur për shkak të masave anti-covid pa makinën luksoze “Range Rover”, të kalonte dhe e ndaloi për një kontroll rutinë.
