Mbi 100.000 transplantime/ Sa fitojnë trafikantët e organeve

Mbi 100.000 transplantime organesh kryhen çdo vit në gjithë botën. OBSH vlerëson se 5-10 për qind e tyre janë të paligjshme. Në treçerekun e rasteve, organi më i kërkuar është veshka.

“Tregu i zi” i transplantimit të organeve, sjell një fitim vjetor 600 milion deri në 1.2 miliard dollarë. Njerëzit nga të cilët blihen këto organe, jetojnë në zonat më të varfra të botës.

Shuma maksimale që u ofrohet për veshkën e tyre është 5 mijë dollarë. Ajo shitet në vendet e pasura deri në 200 mijë dollarë.

Organet më të shtrenjta janë mushkëritë dhe zemra, që kushtojnë respektivisht 300 dhe 500 mijë dollarë. Por transplantimi nuk ndodh gjithnjë me konsensusin e atij që e shet organin.

Mijëra fëmijë grabiten çdo vit, duke përfunduar si viktima të trafikut ilegal të organeve. Kina dyshohet se i trafikon ilegalisht organet e të burgosurve politikë, të cilët vdesin në rrethana të dyshimta. Dikur pre binin budistët e sektit Falun Gong, ndërsa sot abuzimet ndodhin me ujgurët myslimanë në Provincën Xinjang.

                                           TIRANA TODAY