Ambasadori i BE, Luigi Soreca, nuk ka të ndalur me mesazhet në shenjë këmbane alarmi ndaj klasës politike shqiptare, ndërsa opozita nga ana tjetër vijon me protestat. Me anë të një postimi në Twitter, ambasadori vë në dukje se vendi ynë ka hedhur hapa para, por ka ende punë për tu bërë, deri në qershorin e ardhshëm. Por kështu, Soreca kërkon sërish uljen e palëve në një tryezë, për të gjetur gjuhën e përbashkët, e kalimin e këtij ngërçi që ka kapluar.
“Shqipëria ka bërë përparim të konsiderueshëm që nga qershori i kaluar. Ka ende punë për t’u bërë, deri në qershorin e ardhshëm. Është me të vërtetë koha tani për të kapërcyer dallimet partiake, dhe për t’u angazhuar në dialog. Për të mbrojtur interesat e popullit shqiptar që dëshiron të vazhdojë të lëvizë drejt BE-së”.
Deklarata e Sorecës vjen pas vizitës së përfaqësuesve të vendeve të BE-së në vendin tonë.
