Kryeministri Edi Rama e ka cilësuar vendimin e Komisionit Evropian për rekomandimin për çelje të negociatave si një fryt të përmbushjes së detyrave të shtëpisë.
Gjatë konferencës së tij të përbashkët me ambasadorin e BE-së, Luigi Soreca, kryeministri tha se rekomandimi pozitiv i sotëm është një vendim politik, ndryshe nga rekomandimi i një viti më parë, i cili ishte vendim subjektiv. Po ashtu, Rama përmendi si një sukses të madh Reformën në Drejtësi, si një model për t’u ndjekur në rajon.
“Në hapin e parë, gjykimi është objektiv, në hapin e dytë është politik. Në këtë kohë të mbetur, duhet të bëjmë gjithçka që të influencojmë gjykimin politik. Ky është një proces që vazhdon, ka nënvizuar Reformën në Drejtësi. Citoj faktin se Reforma në Drejtësi është unike, gjë që konfirmohet nga fakti se për komisionin, ajo është një model për t’u shtrirë në rajon. Pres me kuriozitet kur t’u kërkohet vendeve të rajonit që të bëjnë të njëjtën gjë.”
Më tej, Rama pati një apel për Bashën dhe opozitën, për të cilat tha se sot është koha të mendojnë për Shqipërinë dhe jo për partinë, të paktën deri në momentin e vendimmarrjes nga KE.
“Përkthyesit mos përktheni nga unë asgjë për opozitën, por një gjë është e sigurt nga raporti dhe e kam apel për Bashën dhe atë pjesë të opozitës që është rrugëve. Deri në momentin e vendimmarrjes nga KE është mirë të mendojnë për Shqipërinë, jo për partinë. Të mendojnë për gjeneratën e radhës, jo për zgjedhjet. Është mirë të mos furnizojnë ata që duan të gjejnë arsye për të thënë jo me pamje të gënjeshtërta nga Tirana që janë protesta partiake, jo popullore”, tha ndër të tjera kryeministri.
Fjala e plotë:
Për ne nuk është një surprizë, afirmoi faktin se i kemi bërë me përpikëri detyrat e shtëpisë dhe për këtë fakt KE sot ka konfirmuar rekomandimin pozitiv pa kushte për çeljen e negociatave për anëtarësim të Shqipërisë në BE.
Vitin e shkruar Shqipëria e mori një rekomandim pa kushte nga Komisioni dhe KE vendosi që në qershorin e 2019 të zyrtarizojë çeljen e negociatave për anëtarësim dhe në dhjetor të nisë procesi në konferencën ndërkombëtare.
E rëndësishme është se komisioni përsëri ka konfirmuar bazuar në fakte, e shifra, ka rirekomanduar çeljen zyrtare të negociatave.
Ndryshe nga sa ka ndodhur në të shkuarën, Shqipëria nuk ka humbur asnjë mik. Ky vit ka qenë një vit pune intensive me komisionin në aspektin e skanimit të gjithë legjislacionit.
Ky është hapi i parë, hapi i dytë konfirmues është Këshilli Evropian, pra mbledhja e të gjithë udhëheqësve politike të KE.
Në hapin e parë, gjykimi është objektiv, në hapin e dytë është politik. Në këtë kohë të mbetur, duhet të bëjmë gjithçka që të influencojmë gjykimin politik.
Ky është një proces që vazhdon, ka nënvizuar Reformën në Drejtësi. Citoj faktin se Reforma në Drejtësi është unike, gjë që konfirmohet nga fakti se për komisionin, ajo është një model për t’u shtrirë në rajon. Pres me kuriozitet kur t’u kërkohet vendeve të rajonit që të bëjnë të njëjtën gjë./ Tirana Today
