Pandemia COVID-19 ka shënuar 5 viktima në vendin tonë. Gjatë 24 orëve të fundit janë shënuar edhe 19 raste të reja me koronavirus, duke e çuar numrin total të të prekurve në 123. Në një kohë kur gjithë vemendja është tek bluzat e bardha, si e vetmja shpresë për jetën, edhe ato nuk janë të paprekshëm.
Drejtori i Urgjencës Kombëtare, dr. Skënder Brataj është konfirmuar pozitiv me koronavirusin e ri, COVID-19 pas kryerjes së analizës. Ai është një personazh që ka vizituar shumë studio televizive, si një ndër zërat e besueshëm në këto ditë ankthi që po përjetojnë shqiptarët. Por një pyetje na lind krejt natyrshëm: Në takimet që ka patur me gazetarë të ndryshëm, sa është propabiliteti që të jenë infektuar edhe ata?! Kur është infektuar mjeku, cili ka qenë itinerari i tij?
Burime jo zyrtare kanë zbuluar se të gjithë infermierët dhe mjekët që kanë punuar me Bratajn janë vetë-karantinuar, ndërsa disa prej tyre kanë kryer edhe analizën për të parë nëse janë infektuar nga COVID-19.
Brataj ka qenë në krye të Task-Forcës të ngritur nga Ministria e Shëndetësisë, për të luftuar përhapjen e COVID-19, dhe kësisoj ka qenë gjatë gjithë kohës në kontakt me persona të infektuar, të cilët mund të kenë qenë burimi i infektimit të tij.
Mbetemi me shpresë që sistemi shëndetësor në Shqipëri, të mos kolapsohet si në Itali apo Kinë.
Vlen të theksohet fakti se kjo është java e tretë që prej ditës kur u kap rasti i parë me koronavirus, dhe shembulli i vendeve të tjera konfirmon se kjo javë dhe tjetra janë periudha kur numri i të prekurve kap kulmin.
Mëngjesin e sotëm u shënua viktima e pestë, ndërsa vetëm gjatë 24 orëve të fundit janë shënuar edhe 19 raste të reja me koronavirus, duke e çuar numrin total të të prekurve në 123.
Qarqet më të prekura janë Tirana me numrin më të madh si edhe Fieri dhe Durrësi.
