Kreu i qeverisë Edi Rama ka zhvilluar një komunikim live me qytetarët, në kuadër të 11 vjetorit të protestës së “21 janarit”. Ai ka vendosur pikat mbi ‘i’ duke theksuar se Partia Socialiste dhe Edi Rama e kanë shlyer deyrimin që u takon, duke iu referuar kështu Reformës në Drejtësi. Ai ka akuzuar se fajtorët e vërtetë në lidhje me vrasjen e katër të pafajshmëve vijojnë duke dëshmuar sërish dhunë, duke u bazuar në përplasjet mes Berishës dhe Bashës për selinë e PD-së. Sipas Ramës, Reforma në Drejtësi është një gur themeli për drejtësinë shqiptare, të munguar në 100 vite.
Sot shënohen 11 vite nga 21 janari i vitit 2011 ku mbetën të vrarë katër protestues; Aleks Nika, Ziver Veizi, Faik Myrtaj dhe Hekuran Deda, për të cilët ende nuk ka asnjë drejtësi. Kryeministri Edi Rama, përmes rrjeteve sociale deklaroi se protestuesit e vrarë ishin të parrezikshëm, ndërsa akuzoi si fajtorë të vërtetë për vrasjen, Sali Berishën dhe Lulzim Bashën.
“Katër protestues në momentin që protesta po shpërndahej, kujtoj se protesta degradoi në disa djegie, por larg objektit të rëndësisë së veçantë, por Kryeministria nuk u prek nga asgjë.
Në atë kohë ishte e rrethuar me gardh dhe dukej si një vilë e madhe personale dhe asnjë protestues nuk e ka kapërcyer atë gardh. Asnjë shishe me benzinë nuk u hodh në atë drejtim, dhe asnjë zjarr nuk ka përfshirë asnjë pemë në atë rrethim.
Asgjë nga ato që ndodhën më pas përballë kësaj godine ku palët politike ndryshuan vendet dhe pala që mbrohet me dyer të blinduara ishin bashkë në agresionet e panumërta mbi Kryeministrinë. Pash sot provokatorë që flasin nga maja e shkallës apo nga prapa bravës se fajin për vrasjen e 21 janarit e kam unë, se i thirra në protestë njerëzit. Por nëse nuk ndalemi te ato që kanë shkrepur këmbëzën e armës, s’kemi si e gjejmë fajtorin.
Ne e kemi shlyer pjesën e detyrimit që na ndikoi për dëshmorët e 21 janarit, dhe këtu e kam fjalën për Reformën në Drejtësi që përgojohet nga kundërshtarët dhe nga armiqtë e saj, që përbaltet foltore më foltore, bravë më bravë, klub mbi klub, sallon me sallon por që është guri i themelit në këto 100 vite ku drejtësia ka qenë një gur në duart e pushtetit ose kandarin e pazarllëqëve”, u shpreh Rama.
