Nga sot hyjnë në fuqi masat anti-covid, ku parashikohet kufizim i lëvizjes nga ora 22:00 deri më 06:00. Dje në një komunikim me mediat, ministrja e Shëndetësisë, Ogerta Manastirliu, sqaroi se masat e reja të propozuara nga Komiteti Teknik i Ekspertëve janë marrë për të bërë të mundur frenimin e koronavirusit. Sot do të hyjnë në fuqi urdhrat për ndalimin e aktiviteteve të bareve, restoranteve dhe kufizimin e lëvizjes së qytetarëve, të cilat do të zgjasin për një periudhë 3 javore. Masat e marra në kuadër të frenimit të koronavirusit, do të jenë në fuqi deri në dy dhjetor.
Ndër të tjera, ministrja deklaroi se sipas urdhrit të firmosur, përjashtim nga kufizimet bëjnë personat që do të lëvizin për emergjenca shëndetësore, apo motive pune. “Qytetarët do të pajisjen me autorizim në e-Albania, përveç rasteve kur janë emergjenca shëndetësore apo për institucionet e shëndetësisë dhe punonjësit e shërbimeve kritike që përjashtohen nga aplikimi në e-Albania”, u shpreh Manastirliu.
Masat ndëshkuese që do të merren për ata që nuk i binden karantinës, do të jenë të njëjtat me ato të lëshuara në aktin normativ të datës 25 mars.
Cilat janë ndëshkimet sipas këtij akti normativ?
Çdo qytetar që shkel orarin policor pa një arsye të domosdoshme dhe pa një autorizim nga e-Albania, gjobitet me 10 mijë lekë të reja.
Kush lëviz me makinë, pa një autorizim të posaçëm nga e-Albania, i hiqet leja e drejtimit.
Të gjithë ata biznese që nuk i binden urdhërit dhe qëndrojnë hapur pas orës 22:00, gjobiten nga 500 mijë lekë deri në 1 milionë lekë të reja.
Kush e përsërit shkeljen, i hiqet mundësia për të ushtruar aktivitetin për gjashtë muaj.
Çdo i infektuar me Covid-19 që nuk zbaton karantinimin nga pakujdesia, merr gjobë deri në vite burg. Ai që e bën me dashje rrezikon 2-5 vite burg.
Kur ka pasoja të rënda në njerëz, personi në fjalë rrezikon 3 deri në 8 vite burg.
Ndërkohë që gjatë kësaj periudhe nuk do të ketë më testime të dyta. Pas periudhës 12 ditore të gjithë të infektuarit do të mund që t’i rikthehen jetës së përditshme, dhe do të pajisen vetëm me vërtetim nga mjekët e familjes se e kanë kaluar pandeminë.
