Ambasadori i BE në Tiranë, Luigi Soreca, ka lëshuar një deklaratë të fortë në Konferencën e nivelit të lartë për Luftën ndaj Korrupsionit. Soreca i mëshoi fort faktit se korrupsioni në Shqipëri është i shtrirë dhe në nivel shqetësues për vendet e BE-së. Ai tha më tej se Shqipëria ka ende shumë punë për të bërë në luftën ndaj korrupsionit, ndërsa kërkohen përpjekje dhe dënime të formës së prerë për zyrtarë të nivelit të lartë.
“Për të arritur bindjen e publikut dhe partnerëve, duhet dënime të formës së prerë të zyrtarëve të nivelit të lartë, që kanë abuzuar dhe janë korruptuar në detyrë”, tha ambasadori i BE-së në Tiranë.
“Shqipëria ka mjaft punë për të bërë në luftën ndaj korrupsionit, kemi parë dënime për zyrtarë të nivelit të ulët e të mesëm. Më shumë se 286 magjistratë që kanë kaluar Vettingun, 62% janë larguar se nuk justifikonin pasurinë.
Vettingu është i rëndësishëm për të marrë besimin e publikut, kemi parë përparime në krijimin e disa institucioneve si SPAK.
Situata e korrupsionit vijon të mbetet i shtrirë dhe shqetësim për vendet anëtare të BE ndaj kërkon përpjekje dhe dënime të formës së prerë për zyrtarë të nivelit të lartë, që është mjaft e ulët. Këto dënime duhet të jenë model për shoqërinë, që të besojnë në drejtësi. Ndaj presim nga SPAK të bëjë punën e tij”, tha Soreca.
