Blutë e Tiranës kanë kapur autorin e grabitjes së postës në Kamëz. Dy ditë nga grabitja e postës është vënë në pranga Elis Suçi. Ky shtetas është kapur pranë zonës së Medresesë në Tiranë. Të njëjtat burime bëjnë të ditur se policia ka mundur të sekuestrojë edhe paratë e grabitura në postën në Kamëz. Kujtojmë se një ditë më parë, në pranga ka rënë edhe bashkëpunëtori, 20-vjeçari Algert Kurti. Dy të rinjtë rreth orës 14:20, nën kërcënimin e një arme, kanë marrë një shumë parash në filialin e postës shqiptare në Kamëz dhe janë larguar.
Dëshmia e Algert Kurtit: S’kam marrë asnjë lekë, Elisi e ka kryer vjedhjen
Kurti përjashton veten nga grabitja, edhe pse pranon se ka qenë në dijeni se Suçi do të bënte grabitje.
“Po qëndroja para gjimnazit të Kamzës. Elisin e gjeta aty tek posta dhe kishte vëzhguar lëvizjet e punonjësve të postës. Kur shkova ta takoj, më tha që do grabisim postën. Unë nuk kam marrë lekë, dhe ku Elisi ka hyrë brenda për të kryer grabitjen unë po prisja jashtë. Kemi qenë në këmbë, jo në makinë. Në momentin që Elisi ka dalë jashtë, kalova në krahun tjetër të rrugës nga ana e gjimnazit. Më vonë kam shkuar në Institut për të lënë një porosi tek një miku im. Nuk kam takuar më Elisin dhe nuk kam folur me të. Thjesht kam pasur dijeni për këtë ngjarje”, tha Kurti para hetuesve.
Njoftimi i policisë
Kamzë
Vijon operacioni policor i koduar “Filiali 2”, i zhvilluar nga Komisariati i Policisë Nr. 5.
Kapet dhe vihet në pranga autori kryesor i vjedhjes së një shume parash, nën kërcënimin e një arme, në filialin e Postës Shqiptare. Sekuestrohen 1 milion lekë të rinj, një aparat celular, një armë zjarri pistoletë dhe veshjet që autori dyshohet se i ka përdorur gjatë kryerjes së krimit.
Shërbimet e Komisariatit të Policisë Nr. 5, në Kamzë, në vijim të punës për goditjen e paligjshmërisë dhe kapjen e personave në kërkim, në vijim të veprimeve intensive hetimore, në bashkëpunim me Sektorin e Forcës së Posaçme Operacionale, bënë kapjen dhe arrestimin në flagrancë të shtetasit E. S., 30 vjeç, banues në Kamzë. Më datë 18.04.2022, rreth orës 14:20, shtetasi E. S., në bashkëpunim me shtetasin A. K., 20 vjeç ( i arrestuar më parë), nën kërcënimin e një arme, kanë marrë një shumë parash në filialin e postës Shqiptare në Kamzë. Në cilësinë e provës materiale janë sekuestruar 1 milion lekë të rinj, një aparat celular, një armë zjarri pistoletë dhe veshjet që autori dyshohet se i ka përdorur gjatë kryerjes së krimit. Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
