Kapen 200 kg kokainë në Portin e Durrësit, konteineri vinte nga Ekuadori

Një sasi prej 200 kg kokainë, e fshehur në tavanin e një konteineri, është sekuestruar në portin e Durrësit.

Ka qenë fillimisht skaneri që ka sinjalizuar dhe më pas është kryer kontroll fizik. Mësohet se konteineri ishte nisur nga Ekuadori, dheënda narkotike kishte për destinacion kompaninë “Massabi fruits” në Kombinat të Tiranës.

Ngarkesa është nisur 24 ditë më parë, teksa operacioni ka nisur shumë shpejt, aq sa prokurorët e SPAK nuk kanë shkuar ende në vendin e ngjarjes.

Prokuroria ka në përgjim disa persona dhe pronarë kompanish të cilët mund të jenë të përfshirë në trafikun e kokainës nga Amerika Latine në Shqipëri.

Pak ditë më parë, më 1 prill, në Portin e Durrësit u sekuestrua një tjetër sasi kokainë prej 49 kg.

Ajo vinte nga Amerika Latine në një konteiner me banane në pronësi të Selim Çekaj, babai i Arbën Çekaj, ky i fundit i dënuar me 14 vite burg për sasinë 613 kg kokainë në 2018. Të dy ndodhen aktualisht në burg.