Ministri i Brendshëm, Sandër Lleshaj, pranoi se kanabisi nuk është ç’rrënjosur plotësisht, ndësa kërkoi ndihmë nga strukturat e policisë dhe institucionet e tjera përgjegjëse. Gjatë “takimit” online me prefektët, drejtuesit qendrorë dhe vendorë të Policisë së Shtetit, për të analizuar masat dhe rezultatet në luftën anti-kanabis, Lleshaj renditi edhe qarqet me risk në kultivimin e bimëve narkotike. Ministri tha se ende nuk janë dorëzuar të gjithë ata që merrem me trafikun e lëndëve narkotike, e ndërsa përpjekja e policisë do të vijojë me intesitet të lartë.
“Kanabisi në vend nuk është çrrënjosur plotësisht. Nuk janë dorëzuar të gjithë ata që duhet të dorëzohen përballë kësaj lufte të policisë dhe organeve të tjera shtetërore.
Përpjekja duhet të vazhdojë me intensitet të lartë. Viti 2020 ka veçorinë e vet që lidhet me angazhimin e madh të policisë dhe strukturave të tjera të shtetit, në përballjen e pandemisë por tani dhe në vijim shtrihet nevoja që përpjekja të intensifikohet në maksimum, edhe risku rritet me lehtësimin e lëvizjes. Lufta kundër kanabisit nuk është përpjekje ekskluzive e policisë, por e të gjithë institucioneve. Theksoj me rëndësi të madhe përgjegjësitë që ka pushteti vendor për të kontrolluar territorin. Puna e policisë duhet të fokusohet ndaj atyre që nuk ushtrojnë përgjegjësitë ligjore”, tha Lleshaj.
Ministri tha ndër të tjera se policia duhet të angazhohet për monitorimin ajror dhe tokësor. Lleshaj u shpreh se duhet të vihet në përdorim flota e helikopterëve, për të mbuluar të gjitha zonat që janë në risk. Zonat me risk janë ende disa qarqe të vendit si Gjirokastra, Shkodra, Durrësi, Vlora, ku kërkohet vëmendje maksimale.
“Kush ka përgjegjësi për territorin dihet, është ose në duar publike ose private. Çdo rast kultivimi në sipërfaqe private është përgjegjësi e pronarëve të asaj sipërfaqe toke. Çdo bimë e kultivuar në sipërfaqe publike është përgjegjësi e administratorëve të atij territori. Nëse nuk e bëjnë atë detyrë, të mbajnë përgjegjësi. Policia duhet të angazhohet për monitorimin ajror dhe tokësor. Duhet të përdoret flota jonë e helikopterëve që kemi në dispozicon, për të mbuluar të gjitha zonat që janë në risk. Sipas informacioneve që disponoj, zona me risk janë ende disa qarqe të vendit si Gjirokastra, Shkodra, Durrësi, Vlora ku kërkohet vëmendje maksimale, pa lënë në harresë dhe qarqet e tjera si Lezha, Berati, Elbasani”, theksoi Lleshaj.
