Kryetari i Bashkisë së Vlorës, Dritan Leli ka reaguar pas djegies së automjetit të tij mëngjesin e ditës së sotme.
Në një intervistë dhënë për gazetën “Mapo”, kryebashkiaku deklaroi se nuk i intereson ngjarja e sotme, pasi po përballet me një problem serioz familjar.
“Kam në gjendje të rëndë vëllanë tim. Nuk më intereson se çfarë ka ndodhur”, u shpreh Leli gjatë bisedës telefonike.
Deri më tani, policia nuk ka një pistë konkrete të hetimit të ngjarjes.
“Më datë 10.10.2019, rreth orës 04:26, në lagjen “Lef Sallata” Vlorë pranë zyrave të punës, ka marrë flakë automjeti tip Range Rover në pronësi të Bashkisë Vlorë (mjet që përdorej nga Kryetari i Bashkisë Vlorë), ku si pasojë e flakëve ka marrë zjarr edhe një automjet tjetër tip Ford, parkuar në afërsi.
Drejtuesi i mjetit Range Rover, shtetasi E.T (shoferi i Kryetarit të Bashkisë) e kishte parkuar mjetin pranë pallatit ku banon. Ndërsa mjeti tjetër tip Ford është në pronësi të shtetasit B.A. Si pasojë e flakëve, të dy mjetet janë dëmtuar plotësisht.
Policia ka ngritur një grup hetimor me qëllim kryerjen e hetimeve të mëtejshme në lidhje me përcaktimin e shkakut të rënies së zjarrit dhe zbardhjen e rrethanave të ngjarjes”, thuhet në njoftimin e policisë.
