Fatbardh Kadilli është zëri i radhës i cili kërkon nga PD-ja që të distancohet nga ish-kryeministri Berisha. Sekretari i Shtetit, Antony Blinken, njoftonte se Berisha dhe familja e tij janë zyrtarisht të papërshtatshëm për të hyrë në SHBA, dhe prandaj edhe ju ndalohet hyrja në vend. Sipas tij, veprat e korrupsionit të Berishës, minojnë demokracinë në Shqipëri.
Duke qëndruar në të njëjtën linjë, Kadilli shkruan se e ardhmja e PD-së nuk duhet të jetë “non grata”. Mjaft i drejtëpërdrejtë, ai thotë se është koha që PD-ja të flasë se çfarë qëndrimi ka për ish-kryeministrin Berisha.
Këto reagime pasojnë pas qëndrimit të fortë edhe të kryediplomates amerikane në Tiranë, Yuri Kim. Mesazhi i ambasadores përçonte në mënyrë indirekte apelin që PD-ja të distancohet nga ish-lideri historik i kësaj partie, Sali Berisha. Yuri Kim tha se do të ishte “një ironi historike dhe tragjedi, nëse partia do duhet të hante bar për hatër të një deputeti të saj”.
Statusi
E ardhmja e PD-së nuk duhet të jetë “non grata”
PD duhet të ketë një qëndrim të qartë në raport me ish kreun e saj Sali Berisha. Nuk mund të presim vendime surprizë apo të minutës së fundit për një çështje që lidhet me fatin dhe të ardhmen e PD-së. As nuk mund të zvarritemi pa bërë asgjë.
Berisha e ka bërë të qartë që fatin e PD-së do ta mbaj lidhur me fatin e vet “non grata”. Basha nuk flet duke e lënë partinë në kryqëzime të rrezikshme politike.
Eshtë momenti të flasë partia çfarë qëndrimi ka për ish kryetarin “non grata”. Kjo është detyrë e Kryesis dhe e Grupit Parlamentar. Për secilin koleg, është nder të ulesh në karriken e kryesisë dhe të deputetit, por së pari është përgjegjësi.
Keni në dorë të merrni një vendim historik. Luhet fati dhe e ardhmja e Partisë Demokratike që nuk duhet të jetë “non grata”.
