Partia Demokratike i ka dërguar ditën e sotme një kërkesë Prokurorisë, me anë të së cilës kërkon nisjen një hetimi për kryebashkiakun e Mallakastrës, Qerim Ismailaj.
Në kërkesë shkruhet se Qerimaj ka qenë i dënuar në Greqi në vitin 1999-2000. Gjithashtu sekretari i Përgjithshëm i PD-së, Gazment Bardhi në kërkesën e dorëzuar shprehet se kryebashkiaku ndodhet në kushtet e ndalimit për të kandiduar dhe për t’u zgjedhur në një funksion të lartë publik.
Kjo sipas tij, pasi dyshohet se ka qenë i ndaluar në Greqi dhe se ndaj tij është marrë masa e dëbimit nga shteti grek.
Informacionet e Partisë Demokratike tregojnë se Qerim Ismailaj ka falsifikuar formularin e dekriminalizimit, për shkak se “pyetjeve nëse është ndaluar apo arrestuar ndonjëherë nga organet ligjzbatuese për kryerjen e një vepre penale, nëse është dënuar ndonjëherë nga autoritetet gjyqësore të huaja apo nëse ndaj tij është marrë ndonjëherë masa e dëbimit nga një shtet i huaj, rezulton se i është përgjigjur me JO”, thuhet nw kwrkesw.
Më tej PD shkruan se sipas ligjit të dekriminalizimit, pasqyrimi i të dhënave të pasakta dhe të pavërteta në Formularin e Vetëdeklarimit, përbën vepër penale dhe sjell skualifikimin e menjëhershëm të subjektit nga kandidimi apo ushtrimi i mëtejshëm i funksionit publik.
