Partia Demokratike ka përgënjeshtruar deklaratën e aktivistes Evi Kokalari, e cila tha në takimin e radhës së ish-kryeministrit Berisha në Durrës, se Basha e ka përjashtuar liderin historik të PD-së, në këmbim të mbylljes së dosjes së lobingut në SHBA. PD njofton se do ta padisë për shpifje Kokalarin, pasi ka përsëritur para shqiptarëve shpifjen e Ramës e Ballës.
Partia Demokratike do të padisë penalisht për shpifje znj. Evi Kokalari, ku në deklaratën për media thuhet se duhet të paraqitet në gjykatë për të provuar akuzat e rreme.
“Një spekulante politike, Evi Kokalari, guxoi sot të përsëriste përpara shqiptarëve shpifjet e Edi Ramës dhe Taulant Ballës ndaj Kryetarit të Partisë Demokratike z. Lulzim Basha. Autoritetet përgjegjëse me kërkesë të vetë Partisë Demokratike hetuan për 2 vite lidhur me shpifjen e Edi Ramës dhe Taulant Ballës, duke provuar në mënyrë ligjore dhe përfundimtare se ato ishin vetëm shpifje.
Ricikimi i të njëjtave shpifje, bëhet për të njëjtin qëllim, atë të mbajtjes në këmbë të regjimit kriminal të Edi Ramës. Për këtë arsye, Partia Demokratike do të padisë nesër penalisht për shpifje znj. Evi Kokalari, e cila mund të paraqitet në gjykatë për të provuar akuzat e rreme me dëshmitarët e saj të rremë Edi Ramën dhe Taulant Ballën.
Kokalari tha se Basha e ‘shiti’ ish-kreun e PD-së, në këmbim të mbylljes së një dosje korrupsioni në SHBA. “Berisha është përjashtuar nga grupi parlamentar i Partisë Demokratike, pasi është këmbyer me mbylljen e dosjes së korrupsionit të Lulzim Bashës, një dosje që ekziston në Shqipëri dhe në Amerikë. Kjo është e vetmja arsye pse është përjashtuar Sali Berisha”, tha ajo.
