Kryeministri britanik, Boris Johnson ka ftuar presidentin e Rusisë, Vladimir Putin që të marrë pjesë në një samit për trajtimin e situatës nga koronavirusi.
Sipas BBC, Britania e Madhe do të presë takimin virtual të udhëheqësve botërorë në muajin e ardhshëm.
Johnson ka telefonuar presidentin Putin duke i kërkuar që t’i bashkohet “për të ndihmuar forcimin e sistemeve shëndetësore dhe trajtimin e koronavirusit, në disa nga vendet më të varfra të botës”.
Konferenca synon të bashkojë udhëheqës botërorë, donatorë dhe prodhues të vaksinave.
“Johnson dhe Putin u pajtuan për rëndësinë e vazhdimit të punës së bashku dhe me vendet e tjera, për mposhtjen e sëmundjes”, tha qeveria britanike në një deklaratë publike.
Kujtojmë se Mbretëria e Bashkuar dhe Rusia janë 2 ndër 5 vendet më të prekura nga COVID-19 në botë.
