Autoritetet në Kosovë duket se janë dorëzuar para koronavirusit vdekjeprurës, ndërsa po shohin mundësi të tjera se ku të shtrohen të infektuarit. Nënkryetari i Prishtinës, Muhedin Nushi, ka paralajmëruar se numri i të infektuarve do të jenë në rritje gjatë ditëve në vijim. Duke analizuar situatën, ai ka thënë se 40 për qind e të infektuarve në nivel vendi, është numër i madh krahasuar me vendet e tjera.
“Rritja e numrit të infektuarve ka qenë e pritur dhe ky nuk është fundi. Ne besojmë që do të jetë numri ende më i madh, duke u bazuar edhe në rritjen e numrit të testimeve i cili po kryhet në nivel të Kosovës. Afër 30 për qind i kemi raste të infektuara në territorit të Prishtinës, por që 40 përqindëshi është në nivel vendi.
Është përqindja e madhe krahasuar me shtete tjera. Ne kemi kërkuar që të bëhen më shumë testime edhe në komuna të tjera. E vetmja mundësi e mbrojtjes nga ky virus është mbajtja e distancën dhe vendosja e maskës.
Nuk kemi strategji të caktuar se ç’ka do të ndodh me personat e infektuar nëse kemi 0 deri 500 veta të infektuar, 1 000 deri në 2 000 apo edhe 3 000”, u shpreh Nushi për ‘Ekonomia Online’.
Nushi shtoi se shtabi i përgjithshëm në nivel qeveritar me atë komunal, duhet të bëjnë përzgjedhjen e hoteleve ose vendeve të tjera ku do të mund të shtroheshin personat e infektuar. Ai është shprehur se kjo nuk është një praktikë e re, pasi në shtete të tjera po shihen hotelet si një mundësi për të shërbyer si spitale të përkohshme.
“Në shtete të tjera po selektohen edhe hotelet për të shërbyer si spitale të përkohshme. Pse kjo të mos aplikohet edhe në Kosovë. Mendoj se shtabi i përgjithshëm në nivel qeveritar me atë komunal, që të bëjë përzgjedhjen e këtyre hoteleve ose vendeve të tjera ku do të mund të strehohem ose të vendosen personat e infektuar. Çështja më kryesore është që kapacitetet shëndetësore vetëm në QKUK duke përfshirë edhe klinika të tjera si ajo e Pulmologjisë mund të jenë të stërmbushura, dhe duhet të gjendet rrugëdalje nga kjo situatë e cila nuk do të jetë e lehtë dhe e shkurtër”, shtoi ai.
