Në mbledhjen e Task Forcës, Ministrja e Shëndetësisë, Ogerta Manastirliu, konfirmoi se deri më tani janë testuar 18 persona, e fatmirësisht nuk raportohet për asnjë të infektuar me koronavirus.
Ministrja paralajmëroi se vendi ynë nuk mund të jetë imun ndaj një rreziku si koronavirusi, por masat janë marrë për të përballur këtë virus që ka një përhapje masive.
“Shqipëria nuk mund të jetë imun ndaj një rreziku si koronavirusi, por jemi bashkë për të bërë më të mirën e mundshme. Deri më tani nuk ka asnjë rast të konfirmuar, janë testuar 18 persona, që rezultojnë negative.
Përveç mjeteve të mbrojtjes personale dhe stokut ekzistues, ka nisur puna për të shpërndarë 1.2 mln maska kirurgjikale në strukturat e parësorit dhe spitale.
1 mln $ janë rialokuar dhe janë shtesë në buxhetet e spitaleve, për të patur stokun e mjaftueshëm për çdo skenar potencial”, u shpreh Manastirliu.
Në Greqi është konfirmuar rasti i katërt me koronavirus. Nga virusi është prekur një 36-vjeçare greke, banore e Athinës, e cila raportohet se kishte udhëtuar në Itali kohët e fundit. Siç raportojnë mediat greke, gruaja ka shfaqur simptoma gripi të lehtë, pa komplikacione dhe tashmë ndodhet në spitalin e Athinës.
Të dhënat mbi koronavirusin COVID-19 sa vijnë e shtohen, po ashtu edhe numri i të prekurve në të gjithë globin. Koronavirusi ka treguar raste të shpërndarjes së tij në disa rajone të Italisë.
