Ish-deputeti i Partisë Demokratike, Ervin Salianji, duke folur për videon e kryebashkiakut të Bulqizës, Lefter Alla, tha se kjo nuk është ndonjë gjë e re për të. Ai ngriti shqetësimin tek bandat, ku për të po drejtojnë vendin e ndërsa institucionet qëndrojnë në heshtje. Pritshmëritë e tij ishin që kryebashkiaku të shkarkohej menjëherë, pasi është filmuar duke pirë lëndë narkotike.
“Institucionet duhet të ishin mankthi i banditëve dhe kriminelëve, ndërkohë që ata vazhdojnë të qëndrojnë në institucione publike. Nuk ka lidhje PD, nuk kam pasur dijeni deri ditën që video është shfaqur, dhe padiskutim reagimi jonë ishte i menjëhershëm.
Edhe reagimi i qeverisë duhet të jetë i menjëhershëm për ta shkarkuar. Nuk është ky rasti i parë. Këta vazhdojnë të qëndrojnë në detyrë, pavarësisht se janë kapur me “presh në duar” si shkelës”, tha Salianji në studion e “ABC News”.
Ai shtoi më tej se ka shumë denoncime në çdo zonë për kryetarët e Bashkisë. Salianji solli në fokus rastin e deputetëve me precedentë penalë. “Kemi deputetë me precedentë të rëndë penal, ky njeri sot ndan me krimin pushtetin. Kryetarja e bashkisë së Durrësit iku për shkak se ia dorëzoi sërish krimit Bashkinë. Çfarë ka pasur të dënuar nga koha e PD, po dalin tani. Ka kaq shumë denoncime në çdo zonë për kryetarët e Bashkisë. Janë plotësisht mjaftueshëm për të tronditur opinioni publik. Nuk ka rëndësi të madhe se kush janë emrat e tjerë. Kanë zaptuar zyrat e Bashkive, për shkak të përfshirjes së Ramës drejtpërdrejt me krimin”, tha më tej Salianji.
