Të tjera detaje kanë dalë lidhur me aksidentin e ndodhur mbrëmjen e kaluar , ku një makinë “G Class” e blinduar me targa ruse u përmbys pranë ish-rreth rrotullimit të Shqiponjës në Tiranë.
Sipas informacionit paraprak dhënë nga Policia, i lënduari identifikohet si Eldin Dergjini, 34-vjeç, nga Shkodra, ndërsa mësohet se rreth 1 orë pasi u shënua aksidenti, 34-vjeçari ishte paraqitur në një spital privat për të marrë shërbim mjekësor.
Sipas “BalkanWeb”, Dergjini, pasi ka marrë ndihmën mjekësore, është marrë në pyetje nga policia.
“Kam qenë duke ecur me makinë me një shpejtësi normale. Me goditi nga pas një mjet tjetër. Humba kontrollin dhe u përplasa me një bordurë dhe makina ime u batua në rrugë. Nuk e pashë mjetin që më goditi. Pas aksidentit jam larguar në këmbë për pak metra dhe pastaj mora taksi dhe erdha në spital”, dëshmon 34-vjeçari, i cili rezulton person me precedent penal.
Mësohet se makina me targe ruse është dërguar në Drejtorinë e Tiranës, dhe i është nënshtruar një kontrolli të imtësishëm por nuk janë gjetur sende të paligjshme në të. Ndërkohë, pronari i mjetit pretendon se makinën e ka sjellë nga jashtë vendit dje, dhe ende nuk e ka pajisur ende me dokumentacion shqiptar.
