Kryeministri Rama ka bërë një përmbledhje të gjendjes në të cilën ndodhen të prekurit me koronavirus. Me anë të një statusi në rrjetin social Facebook, ai njofton se në Spitalin Infektiv janë shtruar 20 persona të moshës nga 30 vjeç deri 85 vjeç.
Nga këta, 3 janë në reanimacion, ku njëri prej tyre është me frymëmarrje të drejtuar.
Referuar deklarimeve të autoriteteve shëndetësore të vendit, numri i konfirmimeve pritet të rritet më tej këtë javë.
Statusi
? SOT, NË VIGJILJE TË JAVËS QË SIPAS TË GJITHA STATISTIKAVE NGRE FURTUNËN KEMI TË SHTRUAR 20 MOTRA E VËLLEZËR, NGA TË CILËT
10 JANË TË MOSHËS 60-85 VJEÇ
6 JANË TË MOSHËS 50-60 VJEÇ
4 JANË TË MOSHËS 30-49 VJEÇ
? VETËM 3 PREJ TË SHTRUARVE JANË NË REANIMACION DHE 1 PREJ TYRE ME FRYMËMARRJE TË DREJTUAR. TË TJERËT JANË NË GJENDJE TË QËNDRUESHME DHE 3 NGA KËTA SHFAQIN SHENJA INKURAJUESE PËRMIRËSIMI
? ZOTI U DHËNTË MJEKËVE E INFERMIERËVE QË KUJDESEN PËR TA TË GJITHË FORCËN E FRYMËZIMIN QË U DUHET DHE LUTJET TONA LEHTËSOFSHIN RRUGËN E KTHIMIT NË JETËN NORMALE TË ÇDONJËRIT PREJ TË SHTRUARVE
Bilanci i COVID-19 në Shqipëri ka shkuar në 42 të prekur. Disa ditë më parë, një prej të prekurve, ndërroi jetë në Spitalin e Durrësit ndërsa deri më tani vatra e të infektuarve është zgjeruar në Tiranë, Rrogozhinë, Elbasan, Durrës, Lushnje dhe Fier. E vetmja këshillë e përbashkët e institucioneve dhe mjekëve është që qytetarët të qendrojnë në shtëpi, dhe të kenë sa më pak kontakte me të tjerët.
