Ndonëse çdo ditë ditë ripërsëritet e njëjta thirrje që qytetarët të ndërgjegjësohen, dhe të mos dalin në rrugë pa asnjë arsye, ky rregull është shkelur në masë. Pavarësisht gjobave, shqiptarët nuk duan t’ia dinë, e ndërsa vijojnë shëtitjet pa ndonjë arsye.
Gjatë 24 orëve të fundit janë evidentuar 29 drejtues mjetesh që kanë shkelur urdhrin e ndalim qarkullimit. Këta shtetas janë ndëshkuar me heqje të lejes së drejtimit dhe bllokim mjeti.
Sakaq, janë ndëshkuar me gjobë 262 shtetas, të cilët kanë lëvizur në këmbë apo me biçikleta. Në të gjithë vendin janë konstatuar 6 njësi tregtie, që nuk kanë zbatuar orarin e mbylljes. Për rrjedhojë, ndaj administratorëve është marrë masa administrative.
Njoftimi
Shërbimet e Policisë vijojnë kontrollet në të gjithë territorin, në zbatim të masave kufizuese të shpallura nga qeveria shqiptare, për vënien në kontroll të pasojave që sjellin përhapjen e COVID-19.
Gjatë 24 orëve të fundit, në të gjithë vendin janë evidentuar 29 drejtues mjetesh që kanë shkelur urdhrin e ndalim qarkullimit, të cilët janë ndëshkuar me heqje të lejes së drejtimit dhe bllokim mjeti, në zbatim të Aktit Normativ Nr. 3, datë 15.03.2020 ”Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19″.
Janë proceduar penalisht 3 shtetas, 1 në Tiranë, për mosbindje ndaj urdhrit të punonjësit të Policisë; 1 në Korçë dhe 1 Gjirokastër, për drejtim mjeti në mënyrë të parregullt.
Në të gjithë vendin, gjatë 24 orëve të fundit, si rezultat i kontrolleve të ushtruara nga strukturat e Policisë dhe denoncimeve të ardhura nga qytetarët në adresat zyrtare të Policisë së Shtetit, në 112/129 dhe Komisariatin Dixhital, janë evidentuar dhe ndëshkuar me masë administrative 10.000 lekë, 262 shtetas, të cilët u konstatuan nga shërbimet e Policisë duke lëvizur në këmbë apo me biçikleta, pa ndonjë arsye apo emergjencë.
Në të gjithë vendin janë konstatuar 6 njësi tregtie që nuk kanë zbatuar orarin e mbylljes dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Policia e Shtetit apelon për të gjithë qytetarët që të respektojnë masat kufizuese, për të bërë të mundur parandalimin e përhapjes së COVID-19.
