Ka reaguar për herë të parë 17-vjeçarja, së cilës iu vendos një sasi tritoli në afërsi të banesës mbrëmjen e djeshme.
E mitura është shfrytëzuar seksualisht nga 4 persona në Fushë-Krujë për tetë muaj. Në një rrëfim për News24, ajo tregon se është abuzuar seksualisht, droguar e më pas shfrytëzuar si prostitutë. Sipas saj, tutorët i bënin presion se do t’i trafikonin edhe motrat, nëse nuk iu bindej urdhrit të tutorëve.
Lidhur me këtë çështje janë shpallur në kërkim edhe dy persona të tjerë, njëri prej të cilëve dyshohet të ketë vendosur tritolin afër banesës.
“Jam abuzuar seksualisht që kur isha 16 vjeçe. Me jepnin droga të forta dhe më detyronin të kryeja marrëdhënie me ta. Shpesh herë edhe më dhunonin fizikisht. Më parë kam konsumuar hashash. Kur festova ditëlindjen e 16-të një djalë që më ngacmonte më dha kokainë. Ajo më bënte të mos isha e përgjegjshme për veprimet e mia.
Jam shfrytëzuar si prostitutë për 8 muaj. Para akteve seksuale që kryheshin pa vullnetin tim më jepnin drogë. Ata shfrytëzonin faktin që babai im ishte në burg. Kanë tentuar të më trafikojnë edhe në Greqi. Shpesh më kërcënonin se do abuzonin seksualisht dhe do trafikonin motrat e mia nëse unë i denoncoja”,- rrëfen vajza.
E ndërsa rrëfen, ajo ka një apel për të gjitha bashkëmoshataret e saj, që të mos ketë të njëjtin fat: “Kam qëndruar 3 muaj në një qendër rehabilitimi në Vlorë. Tani jam e pastruar nga droga dhe u bëj apel gjithë bashkëmoshatarëve të mos i besojnë askujt por vetëm familjarëve. Vetëm ata ta duan të mirën”, tha ajo.
