Dy deputetët e opozitës parlamentare, Myslim Murrizi dhe Artur Roshi, kanë paditur në gjykatë Kuvendin e Shqipërisë. Për shkak të pandemisë, Kuvendi vendosi që në muajin mars, deputetëve t’u mbahej 50% e rrogës për 3 muaj.
Të dy e kanë kundërshtuar këtë vendim të Byrosë e Kuvendit. Ata janë shprehur se kjo është një e padrejtë që u është bërë nga institucioni, prandaj kërkojnë anulimin e vendimit të nr. 44 në datë 02/04/2020.
Sipas këtij vendimi, deputetëve do t’u mbahej 50% e pagës neto vetëm për 3 muaj. Më 2 prill 2020, me vendimin 44 me shumicë të votave, Byroja e Kuvendit vendosi që deri në përfundim të pandemisë Covid 19, por jo më shumë se tre muaj, deputetët të përfitojnë pagë 50 % të pagës aktuale neto. Ky vendim sipas deputetëve është i padrejtë, dhe duhet anuluar, pasi atyre, u janë cenuar interesat e ligjshme.
Në objektin e padisë së dy deputetëve thuhet ‘‘Shfuqizimin e vendimit nr. 44, date 02.04.2020 “ Për trajtimin e përkohshem financiar mujor të deputeteve të Kuvendit të Shqiperisë gjatë periudhës së gjëndjes së epidemisë së shkaktuar nga covid-19”, të Byrose së Kuvendit të Shqipërisë.
Më tej ata kërkojnë që Kuvendi i Shqiperisë, ti paguajë të gjitha perfitimet financiare që burojnë nga legjislacioni për “Statusin e Deputetit”, që lidhen me ushtrimin e funksionit, për periudhën mars 2020- maj 2020 me pagë neto të plotë.
Pas pagimit të pagës së plotë, dy deputetët kërkojnë që ti pasqyrohet kjo pagesë edhe në librezën e punës, duke i kërkuar gjykatës “Detyrimin e palës së paditur Kuvendi i Shqipërisë që në përputhje me “Statusin e Deputetit” të bëjë korrigjimet përkatëse në librezën e punës dhe atë të kontributeve shoqerore”.
