Gazetari Artan Hoxha, duke folur për gomonen e kapur sot në ujërat e Vlorës, tha se bandat kriminale po përdorin mjete mjaft të fuqishme, të cilët nuk mund të kapen nga policia.
Në një intervistë në studion e “ABC News”, Hoxha deklaroi se po vijojnë kërkimet për të vërtetuar nëse ka pasur drogë në skaf apo jo, ndërsa e cilësoi braktisjen e gomones një strategji për të humbur gjurmët.
Ai tha ndër të tjera se trafiku i lëndëve narkotike nga Shqipëria nuk është ndërprerë ndonjëherë. Gazetari shtoi se rasti i sotëm u bë i bujshëm, sepse italianët hynë në lojë.
“Trafiku i lëndëve narkotike nga Shqipëria nuk është ndërprerë ndonjëherë. Ai ka një luhatje si kurba e Covidit.
Gomonet që përdoren sot janë shumë të fuqishëm, të cilat mund t’i kapësh vetëm nëse i mbarohet karburanti, ose në zbarkim të lëndës narkotike, pasi janë shumë të shpejta.
Rasti i Met Kananit është ekzemplar, u kap banda, por nuk u kap kurrë as skafi dhe as skafisti.
Këta njerëz merren me atë punë. Grupet kriminale kanë një aftësi të madhe financiare dhe financojnë për të blerë skafe të fuqishme.
Operacioni i sotëm i zhvilluar ditën në një kohë të mirë dhe prapë nuk u kap ngarkesa dhe as skafistët. I gjithë operacioni në fund u gjet, vetëm skafi i braktisur. Ende nuk dihet tashmë nëse ka pasur ngarkesa. Deri tani kemi vetëm një mjet që është humbje minimale për ata. Rasti i sotëm u bë i bujshëm, sepse italianët hynë në lojë. 1 Kg kanabis në Shqipëri ka shkuar 1000 euro”, tha Artan Hoxha.
