Ministri italian i Shëndetësisë, Roberto Speranza, njofton se Italia do të mbyllë kufijtë e saj për Kosovën, Serbinë dhe Malin e Zi.
Përmes një postimi në Twitter, Speranza tha se ky vendim ka ardhur si pasojë e rritjes së rasteve me koronavirus në këto vende.
“Serbia, Mali i Zi dhe Kosova janë futur në listën e vendeve në rrezik. Atyre që kanë qenë atje në 14 ditët e kaluara, u ndalohet hyrja dhe kalimi tranzit në Itali. Në botë, epidemia është në fazën më të vështirë. Kujdesi maksimal është i nevojshëm për të ruajtur përparimin e bërë deri më tani”, shkruan ai.
Në kulmin e pandemisë së koronavirusit në mars dhe prill, Italia u kthye në epiqendër të infeksionit. Mbi 243,000 njerëz janë prekur atje nga koronavirusi e 35,000 kanë ndërruar jetë. Numri i të infektuarve ka qenë në rënie në javët e fundit dhe ekonomia italiane është në rihapje e sipër.
