Teksa numri i të prekurve e po kështu edhe viktimave rritet nga ora në orë nga koronavirusi, duke shkaktuar një bilanc tragjik, Italia e ka parë të arsyeshme të izolohet. Kryeministri i Italisë, Giuseppe Conte, ka firmosur një dekret që detyron menjëherë masa të reja shtrënguese për lëvizjen e njerëzve.
Deri më 3 prill, në Lombardi dhe në disa provinca: Veneto, Emilia Romagna e Piemonte është ndaluar hyrja dhe dalja e njerëzve. Hyrja apo dalja nga këto zona janë të lejuara vetëm për arsye serioze dhe “të provuara”, për punë ose familje.
Ata që janë në karantinë, nuk mund të lëvizin në asnjë mënyrë. Provincat në fjalë, tha kryeministri, janë: Parma, Piacenza, Rimini, Reggio-Emilia, Modena, Pesaro dhe Urbino, Venecia, Padova, Treviso, Alessandria, Verbano-Cusio-OSSOLA, Novara, Vercelli dhe Asti. Në total, këto masa do të prekin mbi një të katërtën e popullsisë italiane.
Dekreti thotë ndër të tjera se duhet të “shmangni absolutisht çdo lëvizje brenda territoreve, përveç lëvizjeve të motivuara nga nevoja të punës ose situata emergjente”. Ata që kanë “simptoma të infeksionit të frymëmarrjes dhe temperatirë më të lartë se 37.5 °C”, këshillohen të qëndrojnë në shtëpi, dhe të kontaktojnë mjekun e tyre, duke kufizuar menjëherë të gjitha kontaktet sociale. Pushimi i zakonshëm i personelit shëndetësor dhe teknik, si dhe i “stafit, veprimtaritë e të cilit janë të domosdoshme për të menaxhuar aktivitetet e kërkuara nga njësitë e krizës të ngritura në nivelin rajonal” pezullohen.
Kina që është burimi i shpërthimit të koronavirusit, përhapur në të gjithë botën, thotë se numri i rasteve të të prekurve po ulet. Zëdhënësi i Komisionit Kombëtar të Shëndetit, Mi Feng, tha gjatë një konference për shtyp të shtunën se kërcënimi duket se po zvogëlohet në vend, që nga dhjetori kur shpërtheu për herë të parë infeksioni viral. Nga ana tjetër, OBSH-ja bëri të ditur në fillim të kësaj jave se rastet e reja në botë janë rritur me rreth 17 herë më shumë sesa në Kinë.
Në rang global, deri më tani janë regjistruar 3,449 viktima dhe 102,242 njerëz janë të infektuar me virusin vdekjeprurës. Ndërsa janë shëruar 57,624 persona. Vendi më i prekur nga koronavirusi në Europë është Italia.
