Italia ka regjistruar një përmirësim të shifrave nga koronavirusi përgjatë 24 orëve të fundit.
Sipas Worldometers, vendi fqinj ka shënuar një përgjysmim të numrit të viktimave në krahasim me një ditë më parë.
Vetëm 24 viktima janë shënuar brenda 24 orëve, në krahasim me 49 që u shënuan dje, Kështu shkon në 34,634 numri total i personave që kanë humbur jetën nga COVID-19 në Itali.
Një ulje vërehet edhe në numrin e rasteve të regjistruara. Sot janë raportuar 224 raste të reja, 40 më pak se një ditë më parë.
Me mbi 238 mijë raste infektimi, Itali renditet e teta tashmë në botë për numrin më të madh të rasteve me koronavirus, pas SHBA-ve, Brazilit, Rusisë, Indisë, Mbretërisë së Bashkuar, Spanjës dhe Perusë.
Për momentin, në Itali regjistrohen mbi 20 mijë raste aktive.
