Silvana Bushati, e cila u rikthye në vëmendjen e publikut shqiptar pasi Kujtim Gjuzi e bëri zv/Presidente të partisë së tij, duket se i ka shkëputur marrëdhëniet me të.
Në një intervistë për emisionin “Kafsho”, në “Ora News”, Bushati tha se me Gjuzin vetëm sa përshëndeten në rrugë dhe takohen për marrëdhënie pune.
Bukuroshja nga Tropoja u shpreh se tani aspiratat e saj janë në PD. Ajo zbuloi ndër të tjera se do të kandidojë për deputete, pasi për kryebashkiake ‘zor se i lë vend Erion Veliaj’. “Kryebashkiake dhe të dua, s’të lë vend lali Eri, por deputete besoj se po”, shtoi ajo.
Silvana Bushati është njohur për publikun shqiptar pas pjesëmarrjes në ‘Kafazin e Artë’.
Vjet, deputeti Kujtim Gjuzi pati një përplasje në emision me ish-missin shqiptar Silvana Bushatin, të cilës i tha se kishte ballkon të rrezikshëm.
Në muajin shkurt të këtij viti, Silvana Bushati teksa ka qenë e ftuar në emisionin “Ftesë në 5” me Bieta Sulon, ka treguar lidhur me planet e saj më të afërta, që sipas saj kishin lidhje me televizionin dhe politikën.
E pyetur nga Bieta nëse Kujtim Gjuzi e kishte përdorur imazhin e saj për arsye politike, ish-volejbollistja e mohoi, duke u shprehur se ajo nuk kishte plane afatgjata në politikë, edhe pse po planifikonte që të kandidonte shumë shpejt.
