Kanë ardhur reagime nga PD, pas deklaratës së kryeministrit Edi Rama, se e ka të sigurtë fitoren në zgjedhjet lokale dhe jo vetëm.
Ish-deputeti demokrat Bardh Spahija, përmes një statusi në rrjetin e tij social Facebook i bën me dije Ramës se do ta këtë të vështirë, gati të pamundur fitoren në Shkodër.
“Hajde provoje Shkodrën Edi Rama! U emocionua aq shumë kryeministri që administrata iu përgjigj si spektatore shfaqjes së tij, pasi i kërcënoi me vendet e punës, sa filloi të ëndërronte Enverin që i “fitonte” zgjedhjet me 100%, kur populli burgosej e vuante për bukën e gojës. I ka mbet nakel Shkodra e ëndërron ta fitojë edhe pse vetë nuk guxon të shkelë aty. Shkodrën e cila e urren njëlloj si atin e tij shpirtëror, e prandaj i ka mbyllur investimet”, ka shkruar ai.
Sipas Bardhit, qytetarët e Shkodrës e urrejnë kryeministrin, ndërsa thekson se duhet të jetë realist pasi Shkodra do i japë përgjigjen e merituar në zgjedhjet e qershorit.
“Por Shkodra nuk harron dhe e di mirë se çfarë përfaqëson ti Edi Rama. Do të të japë përgjigjen e merituar në zgjedhje si çdo herë, prandaj ti nuk guxon të shkelësh aty, por krekosesh si gjeli majë plehut të zullumeve të tua, nga Tirana. Eja e provoje.
Do të të tregojë vendin, sepse krenarinë nuk ia përkuli dot as ati yt shpirtëror gjakatar e nuk ka shanse ta bëjë një pinjoll i sëmure si ty. Një këshillë si mjek: kombinimi i ilaçeve me substanca të tjera e nën temperatura të larta, rrezikon të të “zhdukë” serish nga skena e shfaqjeve, që aq shumë i ke për zemër! Ta harrosh Shkodrën Edi Rama. Të jesh realist, të bën mirë për shëndetin”, përfundon ish-deputeti Spahija.
