INSTAT raporton se PBB në tremujorin e parë të vitit 2017 vlerësohet me rritje prej 3,94 %, kundrejt tremujorit të parë të vitit 2016.
Kontributin kryesor në këtë rritje, sipas raportit të publikuar të premten e kanë dhënë ndërtimi me +1.00 pikë përqindje, ‘tregti, hotele, restorante dhe transporti’ me +0,51 pikë përqindje, ‘administrata publike, arsimi dhe shëndetësia’ me +0,51 pikë përqindje, ‘industria, energjia dhe uji’ me +0,50 pikë përqindje.
Po ashtu, ndikim pozitiv kanë dhënë edhe ‘aktivitetet financiare dhe të sigurimit’ me +0.37 pikë përqindje, ‘bujqësia, pyjet dhe peshkimi’ me +0,27 pikë përqindje, ‘aktivitete profesionale dhe shërbime administrative’ me +0,27 pikë përqindje, ‘pasuritë e paluajtshme’ me +0,03 pikë përqindje.
Negativisht kanë kontribuar aktivitetet ‘shërbime të tjera’ me -0,01 pikë përqindje dhe ‘informacioni dhe komunikacioni’ me -0,08 pikë përqindje. ‘Taksat neto’ mbi produktet kontribuuan pozitivisht me +0,56 pikë përqindje.
“Rritja ekonomike sot është 3.5 %, të shkojmë në një rritje që me patjetër të jetë 6 e më shumë %. Po së paku duke kaluar nivelin e 5, dihet botërisht se mund të kalohet çdo prag në çdo shtresë dhe aksesi në rritjen ekonomike kthehet në një akses që iu vlen të gjithëve”, pati deklaruar Rama në shkurt të këtij viti, teksa prezantoi programin “1 miliard rindërtim”.
