Gjykata e Vlorës ka caktuar masën e sigurisë “Arrest me burg” për shtetasit Romario Aliraj dhe biznesmenin në fushën e ndërtimit në Vlorë, Arben Veliko.
Këta persona akuzohen për “Kallëzim të rremë”, pasi inskenuan ngjarjen e ndodhur më 12 maj, ku u qëllua me breshëri plumbash makina me të cilin po udhëtonte Romario Alirja, ndërsa ky i fundit nuk pësoi asnjë lëndim.
Fillimisht u raportua se ndaj Alirajt u krye atentat, por fakti që ndaj tij ishte qëlluar me rreth 20 plumba dhe nuk pati asnjë dëmtim, shtoi dyshimet e policisë së Vlorës.
Mësohet se këta dy shtetas, të cilët u arrestuan tre ditë më parë, e kishin inskenuar atentatin me qëllim për të përfituar azil në një nga vendet e Bashkimit Evropian.
Seanca e sotme gjyqësore u drejtua nga gjyqtarja Herila Çela, ndërsa prokuror i çështjes Alfred Salih, i cili kërkoi “Arrest në burg”.
Mirëpo, pak përpara nisjes së seancës, gazetarët janë kërcënuar në sallën e gjyqit nga Arben Veliko. Situata ka qenë e tensionuar deri në përfundim të të gjithë seancës gjyqësore.
