Ministria për Evropën dhe Punët e Jashtme përmes një postimi në Facebook, ka shpërndarë një informacion të rëndësishëm që lidhet me shqiptarët të cilët ndodhen në Bullgari.
“Informacion për qytetarët shqiptarë, të cilët ndodhen në Bullgari. Autoritetet bullgare për Migracionin kanë vendosur që afati i lejeve të qëndrimit afatshkurtër dhe afatgjatë për shtetasit e huaj, të cilat skadojnë gjatë periudhës së gjendjes së jashtëzakonshme, të zgjatet me 6 muaj.
Shtetasit shqiptarë, që kanë një leje qëndrimi drejt mbarimit të afatit përfitojnë zgjatjen prej 6 muajsh të lejes. Shtetasit shqiptarë mund të paraqesin dokumentacionin e nevojshëm për rinovimin e lejes së qëndrimit deri në 14 ditë pas përfundimit të gjendjes së jashtëzakonshme.
Drejtoria e Migracionit ka zgjatur edhe qëndrimin e shtetasve, të cilët kalojnë afatin 3 mujor të qëndrimit në Bullgari.
Shtetasit shqiptarë, të cilët do të tejkalojnë afatin 3 mujor gjatë kësaj periudhe duhet të paraqiten pranë Drejtorisë së Migracionit për të zgjatur qëndrimin e tyre.
Në rastet e nevojës për asistencë, lutemi qytetarëve shqiptarë të kontaktojnë në numrin e emergjencës së Përfaqësisë +359 894 311 493 ose në adresën e e-mail embassy.sofia@mfa.gov.al”, bën me dije Ministria për Evropën dhe Punët e Jashtme.
