Shumë nga ne mbajnë në shtëpi qen ose mace. Por 14-vjeçarja indoneziane Chalwa Ismah Kamal, nuk është si shumica e njerëzve. Ajo ka tërhequr shumë vëmendje në rrjetet sociale falë kafshëve të pazakonta që mban: 6 pitonë gjigantë, të cilët ajo i përkëdhel dhe përqafon në videot që poston.
Fotografitë dhe videot e vajzës indoneziane, kanë habitur por edhe tmerruar ata që i shohin. Shumica e njerëzve do të vraponin të shpëtonin jetën, nëse do ndeshnin përballë një piton, pasi ai mund të gëlltisë lehtësisht edhe një njeri të rritur.
Por Chalwa duket se nuk ka asnjë shqetësim për sigurinë e saj. Ajo thotë për mediat se është kujdesur për gjarpërinjtë e saj që kur ishte vetëm 4-vjeçe, ndaj nuk i ka frikë ata.
Shumë njerëz shprehin rregullisht shqetësimin e tyre për sigurinë e vajzës. Por ajo nuk lodhet së shpjeguar se kafshët e saj shtëpiake nuk janë helmuese, se ato janë të zbutura. Komod me gjarpërinjtë gjigantë nuk ndihet vetëm Chalwa, por edhe vëllai i saj i vogël, që gjithashtu shfaqet në disa nga videot virale.
TIRANA TODAY
