Në protestën e thirrur prej tij, Sali Berisha është goditur me grusht në fytyrë. Një person ka hyrë në radhët e protestuesve dhe ka goditur ish-kryeministrin në fytyrë sapo ka dalë nga selia blu dhe nisi marshimin për në Bulevard.
Ky është momenti kur Sali Berisha është qëlluar me grusht në fytyrë nga një person teksa po shkonte drejt protestës.
Menjëherë kanë ndërhyrë badigardi i Sali Berishës dhe ish shefi i policisë Erzen Breçani që kanë rrahur rëndë personin duke e gjakosur. Atyre i janë bashkuar edhe mbështetësit që nuk kanë kursyer dhunën ndaj tij.
Sali Berisha ka mbajtur fjalën e tij në hapjen e protestës së Rithemelimit. Pavarësisht se u godit me grusht nga një prej personave që ndodhej në turmën e protestuesve, Berisha doli i gjakosur para protestuesve dhe deklaroi se do të rrëzonte kryeministrin, Edi Rama.
“Asgjë në botë nuk na mposht ne, popullin e opozitës dhe popullin e fitores, poshtë Edi Rama, poshtë kriminelët, ne do ju rrëzojmë. Jemi këtu sot së bashku për të protestuar kundër regjimit të horrave dhe kriminelave”, u shpreh Berisha.
