Ish-kreu i Aleancës Kuq e Zi, Kreshnik Spahiu, ka ‘thumbuar’ ashpër kryetaren e LSI, Monika Kryemadhi, në lidhje me shembjen e Teatrit Kombëtar. Nisur nga deklarata e Kryemadhit se Teatrin do ta shembin vetëm po kaluan mbi trupin e saj, Spahiu ka publikuar një foto ironike. Bashkëngjitur saj ai ka shkruar: “Flutra Açka denoncon publikisht Zonjën e Parë: Tradhtarja na tha mbrëmë: “Mos u afroni, nuk ka nevojë për 1000 vetë, as për 100 vetë. Do e prishin po kaluan mbi trupin tim. Ik flini sot sepse nuk vjen policia”. Ishte vërtet thirrja e duhur për këtë natë të bardhë vizitash dhe ditë të zezë pabesie. Qetësia me të cilën e tha, nuk u ngjante atyre të mitingjeve, ishte zbutëse, qetësuese, shëruese…”.
Dy ditë më parë, kryetarja e LSI-së, Monika Kryemadhi u shpreh se Teatri do të shembet vetëm atëherë kur fadromat do të kalojnë mbi trupat e tyre.
“Është shumë e thjeshtë: nëse do të vijnë fadromat, Monika Kryemadhi, Lulzim Basha dhe gjithë të tjerët do të jemi përballë fadromave dhe le të hipin mbi trupat tanë. Ua kam thënë dhe ua them gjithmonë, nuk ka nevojë as për 10 mijë veta, as për 2 mijë, as për 1 mijë, as për 100 veta.
Vetëm ne këtu, kaq. Po të duan le të kalojnë. Prandaj u bëj thirrje të gjithë qytetarëve, turni i natës vazhdon përsëri. Shoqëria civile, përfaqësues të partive politike, të lëvizjeve politike, janë këtu, do të qëndrojnë këtu gjithë natën siç qëndruam ne dje, PD një ditë më përpara e kështu me radhë. Ne do të jemi këtu dhe sigurisht pastaj që beteja jonë këtu nuk është betejë politike, është betejë për trashëgiminë, është betejë për kulturën, është betejë për të ardhmen e fëmijëve tanë, sepse në fund të fundit kjo godinë sado e vjetër të jetë, është si puna e verës; sa më e vjetër të jetë aq më e mirë është”, ka thënë ajo ndër të tjera.
