Sa i takon operacioneve intensive gjatë muajit që lamë pas për shuarjen e zjarreve, kreu i qeverisë Edi Rama ka falenderuar ambasadorët. Ai është ndalur tek ambasadorja amerikane Yuri Kim dhe ambasadori i BE-së, Luigi Soreca, për të cilët tha se kur kemi nevojë, janë qytetarë shqiptarë. Kryeministri nuk kurseu batutën për zv.ambasadorin e ri të SHBA-së, Demian Smith, duke thënë se është i vetmi nga të huajt që kupton shqip.
“Dua të falenderoj ambasadorin e BE-së dhe të SHBA-së. S’është falenderim formal dhe as diplomatik. Sot dua që edhe Luigi dhe Yuri që nuk është e pranishme, por është e pranishme përmes zv.ambasadorit i cili është i vetmi që nuk përdor kufje nga të huajt se di edhe shqip. Dhe na kupton edhe kur ne mendojmë se flasim një gjuhë që nuk e kupton. Të gjithë kanë qenë të vëmendshëm dhe të interesuar për të marrë vesh se si shkoi dita, apo çfarë do të bëjmë sot. Soreca e Kim janë qytetarë kur kemi nevojë, jo ambasadorë. Prania e Holandës dhe Republikës Çeke, dua ti falenderoj për ndihmën që dhanë duke vënë në dispozicion të operacioneve për fikjen e vatrave”, deklaroi Rama.
