Pas takimit prej 60 minutash në Presidencë mes Metës dhe ambasadorëve të Bashkimit Europian, Kreu i Shtetit ka zbardhur detajet e kësaj pritje. Presidenti Meta i ka siguruar që do të dekretojë menjëherë marrëveshjen e 5 Qershorit që u votua dje në Kuvend. Meta zbulon se u ka thënë qartë ambasadorëve që nuk do të miratojë asnjë prekje dhe ndryshim të njëanshëm të Kushtetutës, që synon të asgjesojë shtetin e të drejtës dhe të ardhmen europiane të vendit.
“Kënaqësi të prisja sot Ambasadorët e Delegacionit të BE, të vendeve anëtare dhe të Mbretërisë së Bashkuar të aktedituar në Tiranë. I sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit. Theksova rëndësinë e vazhdimit të punës së Këshillit Politik vetëm në frymën e konsensusit dhe gjithëpërfshirës. I njoha me pozicionin tim të qartë se çdo prekje e njëanshme e Kushtetutës do të konsiderohet si akt i papranueshëm që synon të asgjësojë shtetin e së drejtës, demokracinë dhe të ardhmen europiane të Shqipërisë”.
Dje Kuvendi i Shqipërisë u mblodh në seancë plenare, ndërsa tema më e nxehtë ishte marrëveshja e 5 qershorit, draft i cili u votua me 99 vota, pavarësisht rezervave që kishin për të deputetët e mazhorancës dhe opozitës.
Dje fokusin e mori deklarata e kryeministrit Edi Rama, i cili nga foltorja e Kuvendit u kujdes që të dërgonte mesazh të qartë tek ndërkombëtarët, të cilëve iu kërkoi që të qëndrojnë larg hapjes së listave. Rama u shpreh prerë, se për listat vendosin shqiptarët e jo të huajt.
